SKY2 yavuze impamvu yaserukanye ikamba mu nteguza ya EP ye

Mu ijoro ryo kuri uyu wa Mbere tariki 18 Ugushyingo 2024, nibwo uyu mugabo yagaragaje ko EP ye iriho indirimbo nka ‘Icara wige’, Ibibiga’, ‘Urunana’, ‘Locket’, ‘Tayali’ ndetse na ‘Wimvangira’.

Mu kiganiro na InyaRwanda, Sky2 yavuze ko yahisemo kwitirira iyi EP ye ibiganiro bye asanzwe akora kubera ko “n’iyi ndirimbo ‘Icara wige’ yari igihangano cyanjye, ariko nanone akaba ari n’indirimbo yanjye yabashije kumenyekana cyane.”

Akomeza ati “Mbere y’uko nkora ibiganiro nkabyita ‘Icara wige’ nari mfite umushinga w’indirimbo witwa ‘Icara wige’, kuva ubwo niko nahisemo kwita iyi ndirimbo ‘Icara wige’, kuko mbere y’aho iyi ndirimbo na mbere y’aho nari mfite umushinga wo gukora EP nkayita gutya.”

Sky2 avuga ko yafashe igihe cyo kwiga umuziki ‘ku buryo ngeze ku kigero cy’aho nakora EP ikaze igakora abantu ku mutima’. Yavuze ko hariho indirimbo zitandukanye, ndetse n’imiririmbire iratandukanye.

EP ye izajya ku isoko tariki 30 Ugushyingo 2024, ndetse kuri uriya munsi hazasohoka indirimbo imwe gusa, hanyuma azagenda azisohora bitewe n’iminsi yihaye. Ati “Ntabwo zose nzazifata ngo nzisohorere rimwe. Nta kindi kintu numva nasaba abanyarwanda uretse kunshyigikira.”

Yasobanuye ko indirimbo zose azazishyira ku mbuga zitandukanye zicururizwaho umuziki, ndetse azanazishyira ku rubuga rwe rwa Youtube yise ‘Wabaga he?”

Mu guteguza isohoka ry’iyi EP, SKY2 agaragara yambaye ikamba ku mutwe. Yasobanuye ko yahisemo kwigaragaza muri iyi shusho ‘kubera ko ubuzima bwanjye bwose narirwaniriye, rero nifata nk’Umwami.”

Ati “Impamvu rero nambaye ikamba, ndi umuntu wirwaniriye, naje rero nk’Umwami, iyo uri umuntu ushakisha, ukirwanira, urumva igihe natangiriye nkora umuziki nta ‘Management’ nigeze ngira mu buzima bwanjye, imiziki yose, ni njye wayikora ku giti cyanjye, kugira ngo nyikore bikagorana. Iyo EP nyikoze nta muterankunga, ni ukwihiringa, gushakisha aba Producer, kubishyura n’ibindi.”

SKY 2 yavuze ko yashakaga gushyira hanze iyi EP muri Gicurasi 2024 ariko azitirwa n’ibibazo byo mu muryango. Ndetse, asobanura ko yatangiye kuyikora mbere y’uko yibaruka.

Yungamo ati “Niyambitse ikamba bitewe n’uburyo nashakishije ubuzima, kugeza ubwo ibikorwa byanjye bigiye bimenyekana, iyo rero niyo mpamvu nambaye ikamba.”

Producer Yeweeh wakoze kuri iyi EP ari kuvugwa cyane muri iki gihe, ahanini binyuze mu kuba acuditse na Mbabazi Shadia wamamaye nka Shaddyboo. Uyu musore anaherutse gushyira hanze indirimbo ya mbere yise ‘Dangote’.

To The Hit nawe ari mu ba Producer bakoze kuri iyi EP, azwi cyane nk’umwe mu bakunze gukorera indirimbo QD, ndetse hari n’abahanzi bo mu Burundi akorera. Mu bandi bakoze kuri EP harimo na Producer Tell Them, Waye Beat, Jock on the Track n’abandi.

SKY2 asobanura ko yari amaze igihe kinini akora kuri iyi EP ‘ndetse mfite icyizere cy’uko Abanyarwanda bazayakira neza’.

Umuraperi SKY2 yatanze integuza ya EP ye ya mbere yise ‘Icara wige’ 

SKY2 yavuze ko iyi EP ye iriho indirimbo esheshatu zigaruka ku ngingo zinyuranye 

SKY2 yavuze ko yahisemo kwiha ikamba mu rwego rwo gushimangira ko yirwaniriye mu buzima 

SKY2 yasobanuye ko yifuzaga gushyira hanze iyi EP muri Gicurasi 2024 azitirwa n’ibibazo byo mu muryango 

KANDA HANO UREBE AMASHUSHO Y’INDIRIMBO ‘ICARA WIGE’ SKY2 YITIRIYE EP YE YA MBERE

">